السبت، 25 يونيو 2011

هوا الشعب راح فين ؟؟؟؟!!!!

انا بقى لى وقت طوييييييل جدا ما كتبتش..والحقيقة ما كنتش لاقيه حاجه اكتبها.. فاسمحولى بقى.. انا انهاردة ناويه ارغرى شوية كتييييييييييييييييييرة جدا.. وقد اعذر من انذر.. فمن فضلكم استحملونى..
استعنا على الشقا بالله

هوا الشعب راح فين ؟؟؟؟!!!!

   سؤال بيفرض نفسه علينا حاليا خصوصا لما تعرف ان الويكيبيديا قالت ان فى يوم 11 فبراير نزل اكتر من 10 مليون مصرى فى القاهرة فقط.. وطبقا لقناه اخباريه المانيه قالت ان عدد اللى نزلوا فى مصر فى المظاهرات ما يقرب من 18 مليون فى جميع انحاء الجمهموريه.. اذا كان كل العدد دا شارك فى الثورة -واعتقد ان فى شبه اجماع ان الثورة ما خلصتش ولا حتى اقتربت من النجاح- .. هنا فى سؤال بيفرض نفسه هى الناس دى راحت فين.. هوا الشعب راح فين؟؟!

 فى مصر كلها عموما وفى التحرير بشكل خاص المصريين هتفوا الشعب يريد اسقاط النظام.. كل اللى هتفوا الهتاف دا .. كانوا عارفين ان دى مش نهايه المطاف بالنسبه لهم.. ولكن دى مجرد بدايه من جديد على نضافه.. لما تتخلص من رؤوس الفساد.. من مصادرالفساد.

 الناس كانت عارفة هدفها -اسقاط رموز الفساد- وكانت عارفه طريقها لتحقيقه -التظاهر سلميا الى ما لا نهايه- ونجحنا.. وفعلا انتصرنا.

اصبح صوت الحق هوا الاعلى.. الناس حققت هدفها.. ومن تانى اجتمعت الناس على هدف جديد وهو تطهير النظام..  كلنا كنا عارفين ان الخطوه الجايه هى تطهير النظام.. بس التطهير مش زى الاسقاط .. الاسقاط اسهل.. التطهير محتاج خطة.. اعمال ممنهجه..و مادام  اخترنا وقررنا انها سلمية.. فاحنا محتاجين خطه سلمية  للتطهير.. ولغاية هنا مفيش اى حاجه غلط.. بس الغلط جاى.

سلمنا قياده الثورة للمجلس العسكرى ولحكومة غير ثورية.. وكان دور المجلس والحكومة هو تيسير الاعمال  والقضاء على الفساد الادارى واتاحه الفرصة للاحزاب السياسية للظهور- تيسير الحياة السياسيه- وغيره من الاعمال.. و انا مش هتكلم عن اداء المجلس تانى ولا اداء الحكومة الغير ثورية.. لكن هتكلم عن حاجه جديده نسبيا وليها علاقه مباشرة بسؤالنا انهاردة.. الحقيقة ان المجلس فى محاولة منه لانشاء حياة سياسية جديدة قرر الاعتماد على ما يسمى بالنخب من خلال الحوار الوطنى والوفاق القومى وغيرهم على نفس المنوال النظام القديم وتقريبا بنفس الاشخاص.. مع عمل بعض عمليات التباديل والتوافيق مع للأشخاص على امل ان الشعب ان شاء الله مش هياخد باله.. لكن اللى حصل العكس الناس فعلا اخدت بالها وفعلا قرفت من اللى شافته.. خصوصا ان النخب صدقوا انهم فعلا  نخب.. وابتدوا من تانى يكرروا نفس اخطاء النظام السابق الساقط.. اعلنوا انفسهم اوصياء على الشعب.. اعلنوا نقصان الشعب لاهليته.. فاحنا -الشعب- غير مستعدين للديمقراطية. . وخرجت علينا اراء عجيبه زى صوت الامى منا بنص صوت المتعلم لاننا فى نظرهم شعب جاهل.. لازم يتخاف منه وماينفعش يتساب لهم الحبل على الغارب.. ويقولوا ارائهم عادى كدا يعنى ..  ودا طبعا غير المعضلة الكبرى بتاعه الدستور.. النخب نسيت الشعب وجريوا ورا ايدولوجيتهم.. بغض النظر عن المصلحة البلد ..

هوا الشعب راح فين؟؟؟!!!

تاه من النخب وهرب من وشهم-انا اسفه للتعبير الغير لائق بس حقيقة-  الناس اللى نزلت الميدان شافت ان النخب وصراعهم الحالى.. لا يمثلهم فى شئ .. فتاهوا منهم.. فعلا تاهوا.. ما بقوش عارفين هو المفروض موقفهم يكون ايه..هما عارفين انه رافضين التهريج دا.. بس مش عارفين يعملوا اية.. علشان كدا هربوا منهم.. انفضوا من حواليهم.

 الانتخابات اولا الدستور اولا.. الانتخابات اولا الدستور اولا.. الانتخابات اولا الدستور اولا.

كنا مستنين اكتر..  الشعب اللى هوا انا.. كان مستني خطة لبناء الدولة.. كنا مستنين اننا نشوف هتافنا عيش، حرية، عدالة اجتماعية.. حقيقه قدامنا مش بس هتاف.. كنا مستنين نشوف نخبنا -اللى نصبوا نفسهم نخب-معانا ضد المحاكمات العسكريه.. ضد التعذيب.. ضد ميزانيه حديثة قديمة -حديثة من حيث الزمن قديمة من حيث الفكر-.. بس النخب خذلت الشعب.

مش مهم  الدستور يكون اولا المهم الدستور هيكون فيه ايه.. هنبقى دوله برلمانيه ولا رئاسية ولا خليط وازاى .. فى مجلس شورى ولا هنلغيه.. ولو هيتساب هنضيف ليه صلاحيات ولا هنسيبه زى ما هوا .. صلاحيات الرئيس ايه نظامها معانا.. سقط كل دا من كلام النخب.. وجريوا ورا حربهم على كراسى مفترضة.. حرب غير شريفة.. مضحين فى سبيلها بمصلحة الوطن.. وادى النتيجه.. تفرق الاجماع الشعبى.. صوتنا فى ميدان التحرير اصبح بردا وسلاما لا يشكل اى خطر ولا حتى تهديد.. فقدنا الاجماع الشعبى.

اذا كنا اتعلمنا حاجه واحده من النظام الساقط -وطبعا احنا اتعلمنا حاجات كتير- هى اننا ما ينفعش نسلم بلدنا ومستقبلنا لغيرنا علشان يديرها خصوصا لو كان غيرنا دا شايف نفسه اذكى واعلم مننا واحنا مجرد شوية اغنام المفروض نمشى وراه من سكات.

 الشعب يريد اسقاط النخبة

لالالا لو احنا عايزين البلد دى تكون احسن مما كانت.. من الغباء اننا نكرر نفس التجربة متوقعين نتائج مختلفة.. لازم  يكون زمام الامور دايما فى ايدينا.. انا مش بقول اننا نعادى "نخبنا"  بس نرفضهم لاحد ما هما يجروا ورانا يشوفوا احنا عايزين ايه و يسعوا لتحقيقة.. نرفضهم ونتولى امورنا من غيرهم لغايه ما يعترفوا بينا ند لهم.. لازم كل اللى فى البلد دى يعرفوا ان السلطة الحقيقه فى ايد الشعب.. الشعب وبس.. واى حد فى البلد دى يبدو انه صاحب سلطه.. فهى سلطه معاره  اليه من الشعب.. والشعب ممكن يسحبها منه فى اى وقت.. احلام الشعب اوامر -لان شعبنا طيب وجميل واحلامنا بسيطه وممكنه جدا- واللى مش هيقدر يحققها.. هيكون العيب فيه هوا عجزه هوا مش عيب فى الشعب.. زى ما حاولوا لسنين انهم يقنعونا.

مبادرة تعالوا نكتب دستورنا

احنا هنتولى زمام امورنا.. الدستور دا بتعنا.. بتاع كل مصرى.. ولازم كل مصرى يشارك فى كتابه الدستور.. مش نخب فى غرف مغلقه يتناقشوا فى دستورنا.. ويطلعوا يقوللنا خدوا هوا دا الدستور هوا دا انسب حاجه ليكم.. كتابة الدستور مش عمليه معقده.. كتابه الدستور عمليه المفروض تبتدى من تحت لفوق ومش العكس.. تبتدى من المصرى الفلاح البسيط فى ارضه.. انه يقول احلامه.. عايز يشوف بلده ازاى.. وتتجمع الاحلام دى.. والمتوافق عليها.. مجموعه من المتخصصين يصغوها قانونيا.. دا كل دور النخب انه يصيغوا رغبه الشعب بس مش اكتر.. كان المفروض ان نخبنا هى اللى تقوم بالدور دا.. بس لما هى تخاذلت عن اداء الدور.. كان لازم علينا اننا احنا اللى نقوم بالمبادرة.

مجموعات بحث.. استفتاءات.. متطوعين فى كل المحافظات.. نجمع حلمنا.. بايدينا.. وبعد كدا لما تجتمع الهيئة المؤسسه للدستور.. بغض النظر هى مين ولا اتجمعت ازاى.. بغض النظر هى اولا ولا ثانيا.. المهم لما تتجمع هيبقى عندها رؤية وفكره هوا الشعب عايز ايه.. وكمان الشعب بشكل واضح وبنقاط محددة هيبقى شايف حلمه بيتجسد قدامه.. ولو النخب كتبت فى الدستور غير اللى احنا عايزينه.. نقدر نقولها احنا كنا عايزنها كدا.. هيبقى فى حوار وطنى بجد.. لانه هيبقى بين كل الشعب مش بس النخب.

هى دى مبادرتنا.. فى سطور قليله.. اللى انا شخصيا هشارك فيها.. اتمنى انكم كلكم تشاركوا معايا فيها.. من كل المحافظات.. وعلشان انا مش بعرف اكتب اوى يعنى.. فهسيبكم مع لينك دعوة للمبادرة يارب يعجبكم.. وتقدروا تشاركوا.. وارجوكم اعذرونى عن اى اخطاء فى الموضوع.. واعذرونى فى اسلوب الكتابه اللى مش ولا بد.. بس انا وحده عادية مش نخبة.. فسمحونى.
والله الموفق

اللينك
 http://www.manalaa.net/node/88054

السبت، 11 يونيو 2011

هناك ضباب


 على قوله الرئيس المؤمن-انا ماليش دعوه هو اللى سمى نفسه كدا- بس بجد وحق وحقيقى المره دى هناك ضباب.

ضباب منتشر فى كل مكان.. متسبب فى حاله من الغوغائية والتوهان.. وكأن الضباب مصنوع مش من بخار مياه لا.. من غاز مثير للاعصاب.. باختصار محدش فاهم حاجه..ومحدش عارف يتصرف.. ومحدش فاهم ايه اللى شايفه دا بالظبط.. مش عارفين نوصف اللى احنا شايفينوا بعنينا وحاسينوا بقلوبنا ويكاد يكون حقيقه متجسده قدامنا..  مش قادرين نقول الناس اهى الحقيقه اهى.. لان ببساطه هناك ضباب.. ولان الناس احتمال كبير ماترضاش تسمعنا ولا تصدقنا ولا تمشى ورانا لان هناك ضباب.

والناس معذورة تمشى ورانا ازاى وهما مش شايفين ايه اللى قدامهم ولا هما مقبلين على ايه.. هناك ضباب.


بدايه مأساويه حزينه لوصف وضع ثورى منتصر-او زى ما بيقولوا انتصرنا- بس لا .. انا صحيح مش ثورجيه اوى يعنى بس كمان ارفض انى اكون انهزاميه.. واورفض انى اكتب بس علشان ابث للناس اكتئابى.. ولازم كل حرف بيتكتب يكون ليه هدف.. وانا ليا هدف من وراء كتاباتى هذه.. انى اساعد بلدى ولو بحرف يتكتب محدش يقراه.. بس على الاقل قدام ربنا اكون حاولت.

حقائق
حقيقة.. هناك ضباب
بس مصدر الضباب مش بس المجلس العسكرى والحكومه.. اللى انتقدناه كتيييير قبل وكل الكلام اللى اتقال على المجلس والحكومه قبل كدا هوا هوا ممكن يتقال تانى دلوقتى ونضيف عليه كمان المساوئ والاخطاء وانتقادات جديده.. او بالاحرى جروح جديده اتضافت لجروحنا الاقديمه اللى ما تعلجيتش لغايه دلوقتى ..لكن وبالرغم من دا كله مش هما بس مصدر الضباب.

احنا مصدر الضباب احنا كشعب واحنا كثوار.. لما اتفرقنا وسمحنا لغيرنا يتولى شؤونا.. علشان احنا نتفرغ لخلافتنا.
احنا مصدر الضباب.. لما سمحنا ان فرحتنا ببلدنا اللى اتسرقت منا لوقت طوييييل واخيرا رجعت انها تضتيع وسط خلافات.
احنا مصدر الضباب.. لما بقينا كلنا سياسيين ايدولوجيين.. وتوقفنا عن كنا مصريين.
احنا مصدر الضباب.. لاننا دلوقتى المفروض فى مرحله التطهير.. احنا اسقطنا رؤوس النظام.. ودلوقتى فاضل  الاصابع والكف الذى يتحكم فى حركه الاصابع ويضمن تجمعها.. وبعد كدا فى مفصل الكف اللى بيتحكم فى الكف والاصابع وهكذا.. عمليه تطهير.. بس ازاى هنعمل عمليه التطهير دى باقل الخسائر الممكنه.. واكثر سلميه ممكنه.. اذا ما اتجمعناش واصبح لينا صوت واحد قوى وفعال ومؤثر.. ونتوقف عن كنا سياسيين او ايدولوجيين.. ونرجع تانى بس مصريين.


انا ادعوكم لاول تجربه ايجابيه تدعوا لوحده الصف بينا احنا الشباب بشكل خاص.. ولكن الدعوه عامه لكل من يهمه الامر
الطيور على اشكالها تلتقى.. تجمع المغردين..ندوة للتوصل الى كلمه سواء بيننا.. علشان نرجع بس مصريين تانى.. تفاصيل الندوة على اللينك.. وحتى لو مقدرتوش تشاركوا.. اوعوا تنسوا الفكره.. اننا احنا مصدر الضباب.


ولغايه ما نقدر نرجع نفسنا لنفسنا تانى.. ونرجع الجو الصافى لمصر تانى.. احنا نتحمل كل مشكله تحصل لبلدنا وذنب كل واحد يتظلم وكل واحد يبات جعان.. وكل انسان كنا نقدر نساعده ونرجعله حقه فى حياة كريمه.. واتخاذلنا وسيبناه للظلم تانى.. ذنبه فى رقبتنا.. لاننا احنا مصدر الضباب.
ارجوكم ارجعوا مصريين لمصر تانى


 والله الموفق
الطيور على أشكالها تلتقي

http://www.manalaa.net/node/88043






 

الأحد، 29 مايو 2011

Book Club و دولة القانون

بسم الله
فى ال book club بتاعى كان المفروض نناقش كتاب يوميات نائب فى الأرياف.. انا قريت الكتاب دا مرتين.. مرة وانا صغيره اوى ووقتها حبيت الكتاب جدا لبساطه اسلوبه ولحس فكاهه فيه .. لطيف بس مش اكتر... وقريته تانى من اسابيع قليله وازداد حبى واعجابى بالكتاب.. وهو كتاب صغير وبسيط بالرغم من المعانى الرائعه اللى فيه..و الكتاب من تأليف توفيق الحكيم للى مايعرفش .. وبغض النظر عن النقاد ورأيهم فى الكتاب.. انا بحب توفيق الحكيم جدا.. بحب كتاباته وبحب اسلوبه..


يوميات نائب فى الأرياف


اكتر حاجه عجبتنى واثارت دهشتى فى الكتاب دا انه وبالرغم من  كتابته سنة 1937 .. الا انه لايزال صالحا لمجتمعنا هذا... وكأن الفساد والاهمال واستغلال الفلاح المصرى منذ الازل.. وان كل الناس كانت تنظر للفلاح بشمئزاز فى حين ان مفيش حد بجد حاول محاولة جاده علشان يرفع من شأنه.. وكل الخدمات اللى كانت مقدمه من الدوله للفلاح.. مجرد خدمات شكليه.. ماكنش المقصود منها اصلا خدمه الفلاح.. بعضها  ضره.. اتكلم الحكيم عن انتخابات شكلية وتحقيقات جنائية شكليه ومحاكمات شكليه.. ونظام دوله اصلا فاسد... وغالبا اللى كان بيدفع فاتورة الفساد هو اضعف حلقاتها .. وهو الفلاح فى الرواية.


ولكن اكثر ما اثر فى.. فى هذا الكتاب هو حديث الكاتب عن استيراد القوانين من الخارج.. حتى لو كانت هذه القوانين غير مناسبة للمجتمع المصرى بل وتتعارض  معه فى  بعض الاحيان.. واثر فى هذا المشهد هو بالظبط كما ورد فى الرواية -القاضى يتحدث الى فلاح متهم-
- القاضى: انت يا راجل متهم بأنك غسلت ملابسك فى الترعة
-  الفلاح: يا سعادة القاضى ربنا يعلى مراتبك..يعنى تحكم عليا بالغرامة علشان غلست ملابسى؟؟
- القاضى: لانك غسلتها فى الترعة
- الفلاح: واغسلها "فين"؟؟
فتردد القاضى وتفكر ولم يجد جوابا.


ايه علاقه اللى انا بقوله دا بأى حاجه.. وايه اهميه الموضوع دا


المسأله ببساطه اننا كلنا بنطالب بدوله مدنيه وفيها سياده فعلية للقانون.. ود غير طبعا نقدنا ليل ونهار لجلسات الصلح العرفيه فى كتير من الجرائم وشايفين ان حلها اننا نطبق القانون -وانا اؤمن بدا تماما على فكره-... وفى نفس الوقت فى ناس-ومش اى حد دول اهالى الاطفال نفسهم- تعطفت مع المدرس اللى كان بيعذب ويضرب شوية اطفال.. لأ وكمان فرحوا لما اخلى سبيله واتحكم عليه حكم مخفف جدا.. تقريبا متحكمش عليه اصلا..ووصفوه بالمربى الفاضل -اهالى الاطفال مش اى حد-.. ايه مشكله الناس دى.. ايه الغلط فى المشهد دا.. وزى الموقف دا كتييييييير.. دا احنا كلنا بنعقد نشتم فى نفسنا ليل ونهار" شعب جاهل.. شعب متخلف.. الشعب دا مالوش غير العصايه علشان يمشى عدل".. وحقيقى ما اشبه الليلة بالبارحه.. كمان زمان كانت النخب بتقول كدا على الفلاحين الهمج -غالبا النخب دى فاكسانه من زمان- .


ومن هنا كان يجب ان نقول الآتى -واحنا بنبنى دولة من الأول وجديد كدا بالصلاتو على النبى-.. وعلشان ما تفضلش الروايه دى صالحه الألفية التالته.. وعلشان ما نفضلش نقول على نفسنا الكلام الوحش اللى بنقوله.. وعلشان نخرج من الدائرة المفرغة دى.. وعلشان تبقى عندنا دولة قانون حقيقيه فعاله وتحظى بالاحترام من قبل الشعب.. لازم نتعلم من مشهد الفلاح -لان الغلط فى المشهد دا هو نفس الغلط فى مشهد المدرس السادى واهالى الاطفال- المشهد بيعلمنا 3 حاجات.. اعتبروها دليلك لبناء دولة قانون-وهنبتدى من تحت لفوق- :


تردد القاضى عند سؤال الفلاح "وهغلسها فين" ودا لان وقتها ماكنش فى صرف صحى ولا حنفيات فى البيوت -ومش هيبقى فيه لغايه ثورة يوليو-.. ودا بيعلمنا


1- يجب قبل المعاقبه توفير بديل سهل ومتوافر..الاصل توفير بديل والعقاب على ترك البديل والاتجاه الى وسائل غير مشروعة...والمسأله قياس على اى حاجه.


الفلاح: يا سعادة القاضى ربنا يعلى مراتبك..يعنى تحكم عليا بالغرامة علشان غلست ملابسى؟؟


 2- لازم قبل ما نعاقب على جريمه.. نكون قد اخذنا وقتنا فى تعليم الناس.. لماذا يعتبر هذا الفعل جريمه وما يترتب على هذا العمل من ضرر.. وعقوبة فعل هذا العمل المشين.. ويكفينا هنا ذكر مقوله الامام القرضاوى فى هذا الشأن "من سوء تطبيق "الحدود" أن تطبّق دون تحقيق شروطها؛ فقبل أن يطبق الرسول عليه الصلاة والسلام حدّ السرقة طبّق الاسلام كاملاً، " والمقصود منه تعليم الناس النهج الصحيح فى الحياة.. ثم معاقبتهم على خرقها.. وحتى لايكون العقاب هو اقرب للتعذيب الغير مبرر فى وجهه نظر المعاقب.

3- يجب ان يرى الناس منافع هذا القانون قبل ان يروا عقابه.. علشان يعرفوا ان القانون الغرض منه مصلحتهم.. مش تضيق الحياة عليهم.. وهو دا الاصل فى التشريع.. الاصل افاده الناس.. والناس لازم تفهم دا وتحسه وتشوفه بشكل عملى.


اننا نعلم نفسنا والناس المبادئ دى.. دا اساس بناء دوله سليمة.. قوية.. وشرط نجاحها هو العداله و المساواه  فى التنفيذ-مشكله اهالى الاطفال انه عمرهم ما حسوا ان القانون دا حاجه فى صفهم وعايز الخير ليهم.. لانه عمره ماجبلهم حقهم.. فكانت النتيجه ان القانون فقد مصدقيته عندهم كاداة لنفعهم.. واصبح وسيله من وسائل تجنى وضغط وعدم تفهم المجتمع والحكومه لهم- .. على الكبير و الصغير.. على  النخبة وعلى العوام -على قولة النخبة - .
 و دورنا ودور المؤسسات الاهليه هو نشر التوعية.. تعليم الناس ان القانون مصلحتنا.. وليه هو مصلحتينا.. وهنستفيد ايه باتباعه .. ودور الحقوقيين انهم يقوموا بتطوير القوانين.. والقوانين الظالمه او الغير مناسبة تتغير.. علشان الناس تصدقنا.. وطبعا دور الحكومه صنع وسائل بديله فعاله وميسرة وفى المتناول... والتأكيد بالقول والعمل على سيادة القانون - طبعا كلكم فكرتوا فى معاقبة المخطئين بحزم لالالالا-مش قولنا القانون مش تعذيب.. ولازم يكون مصدر للنفع قبل العقاب.. لا قصدى حد ادنى للأجور مثلا  مدام فى حكم قضائى بدا.


واخيرا تقام دوله القانون.. لما احنا كلنا نقيمها فى انفسنا.. ونعلى شعار احترام القانون مبدأ.. فاذا كان فى خلل فى القانون نهتم بتغيره.. ولا نصنع طرق بديله للتحايل على القانون.. لو التزمنا بكدا هندور على المرشح فى مجلس الشعب اللى مهتم بتغيير القوانين الغير عادلة.
يارب كلامى يكون مفيد
والله الموفق

الأربعاء، 25 مايو 2011

#May27

تحديث:

كثر الكلام عن يوم الجمعة 27 .. خصوصا على الفيس بوك.. فانا عايزه اطمنكم كلكم.. والله العظيم الشعب والجيش ايد واحده.. واحنا مش ضد الجيش خالص ابدا.. ومفيش اى مطالبه بتأجيل الانتخابات.. ولا الالتفاف على الاستفتاء.. احنا كلنا نحترم الديمقراطية.. ونحترم نتيجه الاستفتاء... ومفيــــــــــــــــش مطالبه بمجلس رئاسى والله العظيم  مافى .. اومال احنا عايزين ننزل ليه.. اقروا بقى باقى التدوينه

والله الموفق

#May27

صباح الخير.. او مساء الخير.. حسب انا هقرا التدوينه دى امتى .. لان مفيش غيرى هيقراها.. بس عموما انا سعيده

#May27
موضوع الكتابه دا طلع صعب جدا .. بس هعمل ايه.. محتاجه ارتب افكارى.. فى وسط الزيطه والمهرجانات االاعلاميه.. اللى بنشوفها كل يوم .. هى بصراحه ساعات بتكون مفيده.. وكتيييير بتكون بس مزعجه.. واسوأ حاجه فى الموضوع دا.. ان فى وسط الاراء والتصريحات .. ممكن تضيع منى افكارى وارائى الخاصه.. هى ممكن ماتكونش اراء كويسه.. بس بتاعتى عايزاها.. وفجأة تلاقى نفسك بتردد الكلام اللى كل الناس بتقوله -حسب انت بتقعد مع مين- وغير ما تعرف انت بتقول ايه.. لو انت قاعد على شمال - يسار- الملعب تبقى انت مع الثورجية -زى حالاتى- هيبقى يوم 27 هو اهم يوم فى حياتك ومطالب الثورة معروفه.. ولا تراجع ولا استسلام عن اى مطلب منهم.. ولو قاعد على يمين المعلب .. يبقى حراااااام عليكم عجلة الانتاج وقفت .. البلد باظيت .. اتهدوا بقى ويكملهالك بالثائر الحق -ومحسسنى ان كلهم اتربوا عليها..قال يعنى مش لسه مكتشفنها من اسبوعين بس مثلا يعنى -.. ولو انت فى النص ياغلبان فانت بيسموك التيار الرئيسى.. ربنا معاك..اسمعها منى محدش هينقذك غيره.

الناس دى كلهم كويسين.. انا مش بقول انهم صح او انهم غلط.. كل اللى بقوله ان دا رأيهم هما..طيب انا فين.. وبما ان التَميز فى هذا الزمن بقى مالوش وجود فمتتوقعهوش منى... لانى ببساطه موقفى زى موقف الثورجيه.. ولكنى لست منهم.. لعلى انال بهم شفاعه..يارب!!!!
ايه اللى انا بقولة دا..

خالينا ندخل فى المهم ...
انا مع يوم 27 علشان فى حاجات كتير لازم تتغير ..ويمكن انا عكس كتييير من الناس.. انا غاضبة حانقة على الحكومة اكتر من المجلس العسكرى.. حكومة السياسات القديمة- يادى الخيبه  حكومة الثورة مش ثورية-.. بل تقليدية.. زمان وانا صغيرة مكنتش بفهم فى اى حاجه ولازالت.. لكن كنت دايما اتخانق مع ماما الناصريه.. واقولها عبد الناصر دا راجل وحش.. شريف بس وحش.. مش هسامحه ابدا انه الوحيد اللى كان فى ايده فرصه ذهبيه انه يصنع مصر وضيعها.. التاريخ عمره ما هيسمحه على تضيع الفرصه دى.

ودلوقتى سيدى شرف انت كمان راجل شريف-على ما اعتقد- وكمان فى ايدك فرصه ذهبيه.. ارجوك ماضيعهاش.. بالسياسات القديمة..والاساليب الغير مجديه.. انا معرفش الظروف البلد الاقتصاديه ايه بالظبط.. غير الكلام اللى بيقولوه علشان يخوفونا بيه.. بس انا عارفه انك لغايه دلوقتى ما طلعتش كلمت الناس وقولتلهم احنا عندنا خطه انقاذ وهى كالاتى.. فين خططتك يا استاذى.. حكومة ادراة الازمات دى ماتنفعش.. وياريتها حكومة حل ازمات.. لأ.. بس ادارتها.. طيب ازاى بتطلب من الناس تبطل تظاهر واعتصام-وانا مش ضد التظاهر على فكرة-..ما حضريتك علمتهم ان الحكومة مش هتبصلك غير بأزمة.. وبعد كدا طبعا تيجى الحكومة علشان تديير الازمة ومش تحلها. والامثله على دا كتيييييييير.. خسارة..

انا مع يوم 27 علشان:.

1- تراخى الحكومه غير مقبول.. حكومة اخدت شرعيتها من الثورة لازم تكون حكومة ثورية التباطأ فى تنفيذ المطالب عجيب- حد ادنى لأجور ومش هتقدروا عليه... ماشى هنعديها.. طيب وحد اقصى دى كمان صعبه-.

2- ثورة قامت ضد الظلم يبقى ما ينفعش بعدها نلاقى مكتوب على جدران الزنازين..بعد النصر لسة في ظلم... علشان مكالمة د.مصعب الشاعر دى مصيبه..بكل المقاييس.. مصيبه.

3- علشان الحكومه لسه بتتعامل مع الشعب بنفس اسلوب التهميش القديم-حكوميتنا مش واثقه فينا- يعنى يا د.شرف قبل ما تلف على الدول تشحت لنا  رزقنا .. وتستلف من صندوق النقد الدولى-ودا طبعا مش ببلاش تمنه حريتنا اللى فى مننا مات علشانها- اعمل مشروع قومى بجد.. جمع الناس حواليه.. ولو ماعرفناش نجمعلك الفلوس اللى انت محتاجها روح استلف اللى نقصك  بس نبقى حاولنا.. اشركنا معاك.

4- دوله مدنية يعنى دولة قانون بغض النظر عن اى شئ تانى جريمه.. تحقيقات.. قانون عدالة.. علنية.

5- نيجى بقا لاخونا المجلس  التدوينة اللى فاتت كلها اهداء ليه بالاضافه لكل اللى اتكتب فى يوم التدوين العالمى.

 نفسى اتكلم علينا احنا بقى شوية.. علينا كلنا.. اخوان وليبراليين ويسار ويمين ووسط..وكل بنى آدم على ارض مصر.. دا مش وقت الخلاف على السياسات ولا الطموحات السياسية على حساب البلد.. دا وقت كل واحد يتخطى نفسه وطموحه وايدولوجيته..ويخرج بس علشان مصر.. حتى لو كان دا ضد مصلحته السياسية.

مطالب الثورة



والله الموفق

الأحد، 22 مايو 2011

حكم العسكر.. يا حكم العسكر

طيب  باسم الله و استعانا على الشقى بالله

هو انا بعمل ايه بالظبط الحقيقة مش عارفه .. دا اول بلوج ليا وانا ماليش فى موضوع  الكتابة اصلا  يعنى.. حكمة ربك فى خلقة ان كل واحد فينا يبقى ليه مواهبه فى الدنيا
اللى ربنا بيميزه بيها.. صحيح انا مش عارفه ايه مواهبى.. بس انا عارفة اكيد ان الكتابه مش منها

ولكن اللى قبلنا قالوا ايه اللى رماك على المر.. قلنا الامر منه.. وبما انى هتدرب على الكتابة فى الامر منه.. فانا لااحمل فى قلبى ذرة شفقه تجاه الامر منه...
   
خلونا ندخل فى الموضوع .. فى الامر منه .

حكم العسكر :.
المفروض انهارده ان دا يوم التدوين كل واحد يبوح بالللى فى قلبه تجاه اخونا المجلس ربنا يجعل كلامنا خفيف عليهم... وانا مش ثوريه بطبعى وعملى.. علشان كده كلامى مش هيبقى ثورى خالص .. وهيبقى كلام على قدى جدا بس يارب يفيد..

اخونا المجلس.. اعرف انى انا مش بكرهك. وانى ان شاء الله  عمرى ما هكرهك.. بس من اول ما نزلت الدبابات الشارع تحمى الثوار.. وانا كنت عاملة حسابى انى احبك .. بس دلوقتى انا بجاهد نفسى طول الوقت انى بس مش اكرهك.

يا عزيزى المجلس
انا عارفه انك بتزعل اوى وتدايق مننا لما بنقول الكلام دا وبتعتبرنا جاحدين.. علشان ازاى مش مقدرين جهودك وتعبك وتضحيتك معانا .. و قبل ما ندخل فى الكلام الجد.. ثق ان كل االى بتقول عليه دا احنا كنا مقدرينه اكتر منك وكنت عندنا فوق جدا.. واحنا كشعب اساسا مش بنعرف نحسب أو نحاسب اد ما بنعرف نحب.. ايه الاتغير.. احنا مش جاحدين.. ايه اللى اتغير.

بص يا صديقى المجلس الموضوع ببساطه يتلخص فى مقارنة بسيطه اوى احنا خرجنا ليه
قبل الثورة.. وايه اللى بيحصل دلوقتى... وانت هتفهم ايه اللى مدايقنا ومزعل لنا منك على طول.

مصر قبل الثورة ومصر بعد الثورة
قبل الثورة:
كان اى معارض سياسي او اى واحد يتجرأ وبقى ليه راى معارض  للحكومه.. كان بيعتقل ويتعذب

بعد الثورة:
الوضع ماتغيرش  كتير.. ومش عارفه افكرك بايه ولا بايه.. مواقفك معانا فى الموضوع دا كتير وكلها توجع.. وف منها اصلا.. اللى خجلا مقدرش اتكلم عنه.. فانا مش هجيبلك القديم والجديد بس هفكرك بالسفارة الاسرائيلية.. مظاهره سلميه وانت يا حضرة المجلس رفضها.. ماشى غلط بس ماشى.. وقررت تعتقل اللى فيها.. ماشى غلط بس ماشى.. لكن تضربهم وتهنهم وتعذبهم ليه.. حقيقى ليه.. اقولك انا مش هتكلم فى الموضوع دا تانى.. علشان ما نجرحش بعض اكتر.

قبل الثورة:  
كان الوضع ودن من طين وودن من عجين..

بعد الثور ة:
 Guss what...بس دا كان علشان هما مايهمومش مصلحه البلد.. بس انت المفروض عكسهم.. طيب ايه اللى بيحصل دا.

طيب اقولك علشان انا مش سوداويه .. مش هقلب عليك المواجع وافكرك بالذى كان.. لكن بس هكتب لك مطالبنا.. واشهد بنفسك.. احنا طالبنا باية غلط.. او مش حقنا.. وانا بقول الكلام دا مش علشان اثير الفتنه ولا اعمل مشاكل وغالبا محدش هيقرى التدوينه دى غيرى.. بس مع ذلك انا بكتب الكلام دا علشان  عايزه اصلح.. علشان انا مش ثورية بطبعى لكن تصرفاتك بتجبرنى انى اكون على غير طبيعتى وطبعى.. يا صديقى المجلس.

المطالب:.


دى مش طلباتى ولا  مطالبى دى المطالب اللى عليها اجماع شعبى.

والله الموفق والمستعان